बहुजन समाज पार्टीची चंद्रपूर येथे संघटन समीक्षा बैठक उत्साहात संपन्न.

चंद्रपूर, दि. ४ जून २०२६ : बहुजन समाज पार्टीच्या महाराष्ट्र प्रदेश नेतृत्वाच्या आदेशानुसार चंद्रपूर जिल्हा समिती व जिल्ह्यातील सहाही विधानसभा क्षेत्रांच्या पदाधिकाऱ्यांची तातडीची संघटन समीक्षा बैठक बहुजन हिताय नागरी पतसंस्था, तुकूम, एस.टी. वर्कशॉप समोर, चंद्रपूर येथे संपन्न झाली.

सदर बैठकीचे प्रमुख मार्गदर्शक मा. ॲड. सुनीलजी डोंगरे साहेब (प्रदेश अध्यक्ष, बसपा, महाराष्ट्र) होते. मा. डॉ. मोहनजी राईकवार साहेब (प्रदेश महासचिव, बसपा, महाराष्ट्र) यांच्या निर्देशानुसार तसेच मा. इंजी. महेंद्रजी मकेश्वर साहेब (प्रदेश सचिव, बसपा, महाराष्ट्र) यांच्या मार्गदर्शनाखाली या बैठकीचे आयोजन करण्यात आले होते.

मंचावर मा. डॉ. मोहनजी राईकवार साहेब, मा. इंजी. महेंद्रजी मकेश्वर साहेब,ॲड. पाटील सर, सेवानिवृत्त आयकर आयुक्त मा. संजयजी ठूल, लोकसभा प्रभारी मा. धर्मेशजी निकोसे तसेच चंद्रपूर जिल्हाध्यक्ष मा. रत्नाकरजी सत्ते यांची प्रमुख उपस्थिती लाभली.

कार्यक्रमाचे प्रभावी संचालन प्रा. डॉ. विश्वनाथ लाडे यांनी केले.

यावेळी चंद्रपूर महानगरपालिकेतील प्रभाग क्र. १३ च्या नगरसेविका तथा बहुजन समाज पार्टीच्या नेत्या मा. सौ. सोनियाताई प्रशांत उंदीरवाडे व मा. प्रशांतभाऊ उंदीरवाडे यांचा शाल व पुष्पगुच्छ देऊन सन्मान करण्यात आला.

बैठकीत मा.ॲड. सुनीलजी डोंगरे साहेब यांनी पक्ष संघटना बळकट करण्याबाबत सखोल व प्रेरणादायी मार्गदर्शन केले. आगामी जिल्हा परिषद व इतर स्थानिक स्वराज्य संस्थांच्या निवडणुकांच्या पार्श्वभूमीवर संघटन विस्तार, गाव ते शाखा स्तरापर्यंत पक्ष मजबूत करणे, नवीन कार्यकर्ते जोडणे व बूथस्तरावर संघटन उभारणी यावर विशेष भर देण्यात आला.

यावेळी एक महत्त्वपूर्ण घोषणा करत सेवानिवृत्त आयकर आयुक्त मा. संजयजी ठूल यांची नागपूर पदवीधर मतदारसंघासाठी उमेदवारी जाहीर करण्यात आली. तसेच पक्षाच्या विचारधारेचा प्रसार व संघटनात्मक मजबुतीसाठी मिनी कॅडर कॅम्पचे आयोजन करण्यात आले. गाव ते शाखा स्तरावर संघटन विस्तारासाठी नवीन दिशा व घोषवाक्य देण्यात आले.

बैठकीस जिल्हा, विधानसभा व शहर कार्यकारिणीतील पदाधिकारी तसेच मोठ्या संख्येने कार्यकर्ते उपस्थित होते.

कार्यक्रमाचे आभार प्रदर्शन जिल्हा महासचिव शुभाजी पेटकर यांनी केले.